articles

பாரதிப் பெண்ணே ... போரிடு பெண்ணே... - நவகவி

பாரதிப் பெண்ணே போரிடு பெண்ணே எழுஎழு பெண்ணே!

ஆணாதிக்க எதிர்ப்புப் படையில்  நடையிடு முன்னே!

ஆயிரம் கால விலங்கினை நொறுக்கும் போர்ப்படை ஆரம்பம்!

தங்கமாய் அல்ல நீ சிங்கமாய் வந்ததால் கோட்டையில் பூகம்பம்!

(பாரதிப்)

 பூமியில் பாதி பெண்ணே -அவள் பூமித்தாயின் கண்ணே!

எனினும் அவள் நிலை இங்கே -ஒரு இனிப்பு தடவிய புண்ணே!

ஆணை விஞ்சிய உழைப்பு-ஆனால் அடிமை நாய் போல் பிழைப்பு!

வானை நகர்த்தும் வலிவு-ஆனால் வாழ்வை நகர்த்த தவிப்பு!     

பெண்ணை பிடித்த பீடைகள் இனி ஓட

    நவ யுக நாயகி வா புவி உனதாக!

(பாரதிப்)

பிறந்ததும் தந்தையின் அடிமை-நீ  மணந்ததும் கணவனின் அடிமை!  

முதுமையில் மகனுக்கு அடிமை-உன்  மூளையில் எத்தனை சிலுவை!  

இல்லம் படகு நீ துடுப்பு-ஆனால்  இருப்பிடமோ புகை அடுப்பு!  

குழந்தை நீ மட்டுமே சுமந்து-சுமந்தே  குறுகிச் சிறுத்ததுன் இடுப்பு!    

 சந்தையில் விற்கிற மந்தையைப் போன்ற நிலை!   

 தகர்த்திடு பெண்ணடிமை எனும் நாசவலை!    

(பாரதிப்)  

பெண்ணடிமைத்தனம் பேணிக்-கொண்டே பெண்ணை தெய்வம் எனல் நன்றோ!

செருப்பால் அடித்தபின் தீர்த்தம்-கொஞ்சம் தெளிப்பது கேவலம் அன்றோ?

ஆவேசப்பட அல்ல -பெண்  அழுவதற்கே சுதந்திரமே!  

கோபம் கொள்ளவும் அல்ல - பெண்  குனிவதற்கே சுதந்திரமே!       

   விமானம் ஓட்டும் பெண் எனும் போதிலுமே   

 வீட்டினில் பானை அவள் மட்டும் ஏந்தணுமே!  

 (பாரதிப்)

 கல்லுடைக்கையில் சிறு சில்லாய்-களை எடுக்கையில் குனிந்து வில்லாய்,

சூளையில் நீ செங்கல்லாய்-தினம் துடித்தாய் வாழ்வே முள்ளாய்!

சட்டம் சொல்வது உண்டு -நீ சரி நிகர் சமானம் என்று! சரி நிகர் ஊதியம் ஏது?-

உனை சாய்த்தது ஆள்பவர் சூது!      

சோகை நோயில்நீ! ரத்தம் இல்லை உனக்கு!   

 தோகை மயில் என கவிதை சொல்வது எதற்கு?

 (பாரதிப்)

 கவிதையில் மட்டும் நிலவு-நிஜத்தில்  கண்டேன் நீ வெறும் சருகு!

 உணவு உனக்கு கனவு -வற்றி  ஒட்டிப் போனதுன் வயிறு!

வாழை இலை என வயிறை -கவி  வருணிப்பான் அது சரிதான்!  

விருந்தே பரிமாறாத - ஒரு வெறும் வாழை இலை அது தான்!

நூற்றில் எண்பது பெண் வறுமை நிலைமை! நோஞ்சான் நிலமை! கவிதையில் தான் வளமை !

 (பாரதிப்)  

சொத்துக்காரி என்றாலும் -வெறும் கூலிக்காரி என்றாலும், எத்தனை காலம் இவளே -

பார் இரண்டாம் தரக்குடி மகளே !  பிறந்தாய் பெண்ணே எனினும் -

மீண்டும் பிறப்பாய் புதிதாய் புதிதாய்! நிலவாய் அல்ல அல்ல

-சினந்து எழுவாய் சூரியக் கதிராய்      

ஆண் பெண் சமத்துவம் இனி வரும் யுகதருமம்     

அனைத்துக்கும் அதுவே அடிப்படை தருமம்

(பாரதிப்)